«Ham mas’uliyat, ham javobgarlik belgilandi» – energetika vaziri

Energetika vaziri Jo‘rabek Mirzamahmudovning ta’kidlashicha, davlat rahbari mutasaddilarga cheklovlarsiz va uzluksiz elektr ta’minotini ta’minlash bo‘yicha topshiriq bergan. Uning qo‘shimcha qilishicha, noyabr oyida havo haroratining pasayishi sababli zaxira resurslari jalb qilingan.

Prezident Shavkat Mirziyoyev 15 noyabr kuni aholi va iqtisodiyot tarmoqlarini energiya bilan uzluksiz ta’minlash, soha korxonalarida samaradorlikni oshirish masalalari bo‘yicha yig‘ilish o‘tkazdi.

Energetika vaziri Jo‘rabek Mirzamahmudovning ma’lum qilishicha, davlat rahbari mutasaddilarga cheklovlarsiz va uzluksiz elektr ta’minotini ta’minlash bo‘yicha topshiriq bergan.

«Taqqoslaydigan bo‘lsak, bu yilgi noyabr oyi o‘tgan noyabrga nisbatan salqinroq bo‘lib, qor yog‘di. Harorat -3 darajagacha, ayrim hududlarda -8 darajagacha pasaydi. Natijada tabiiy gaz va elektr energiyasi iste’moli keskin oshdi. Ushbu rejimlarini ta’minlash uchun zarur zaxira resurslari ishga solindi. Gaz omborlarida yetarli hajmda gaz to‘planishi hisobiga gaz bilan ta’minlandi. Aholi uchun ham, iqtisodiyot tarmoqlari uchun ham uzluksiz yetkazib berish ta’minlandi, Bundan ham sovuq, -10, -20 darajagacha harorat pasayganda ham qanday ishlash bo‘yicha topshiriqlar bo‘ldi. Bu masalalar bo‘yicha ham mas’uliyat, ham javobgarlik belgilandi» — dedi u «O‘zbekiston 24» telekanaliga bergan intervyusida.

Avvalroq, bu yil qish mavsumida iste’molchilarga 21 milliard kub metr gaz yetkazib berish hisob-kitob qilingani xabar qilingandi.